ភ្នំពេញ៖ ឯកអគ្គរដ្ឋទូតអាល្លឺម៉ង់ប្រចាំកម្ពុជាលោក Christian Berger បានលើកឡើងថាទំនាក់ទំនងកម្ពុជា-អាល្លឺម៉ង នៅតែរក្សាបានល្អប្រសើរទោះបីជាមានឧបសគ្គដោយសារជំងឺរាតត្បាតកូវីដ-១៩ក៏ដោយ។ លោកសង្ឃឹមថាទំនាក់ទំនងនេះនឹងនៅតែមានការរីកចម្រើនថែមទៀត។ លោកថ្លែងបែបនេះក្នុងពេលចូលទៅជម្រាបលានាយករដ្ឋមន្ត្រីកម្ពុជា សម្ដេចតេជោ ហ៊ុន សែន នៅវិមានសន្ដិភាព ព្រឹកថ្ងៃអង្គារ៍ ទី២១ ខែមិថុនានេះ។

លោក Christian Berger បានលើកឡើងថាក្នុងរយៈពេល៣ឆ្នាំ ដែលលោកកាន់តំណែងជាឯកអគ្គរដ្ឋទូតអាល្លឺម៉ង់ប្រចាំកម្ពុជា បានប្រព្រឹត្តិទៅដោយរលូន និងរក្សាបាននូវទំនាក់ទំនង កិច្ចសហប្រតិបត្តិការទ្វេភាកីរវាងប្រទេសទាំងពីរផងដែរ។ ការរីកចម្រើននៃទំនាក់ទំនងនេះជាអ្វីដែលអាល្លឺម៉ងនិងកម្ពុជាចង់បាន។

នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានថ្លែងអំណរគុណដល់លោក Christian Berger ដែលបានជួយឱ្យទំនាក់ទំនងកម្ពុជា-អាល្លឺម៉ង់កាន់តែមានការរីកចម្រើន និងបានជូនពរដល់លោកឱ្យទទួលបានជោគជ័យបន្ថែមទៀតនៅថ្ងៃអនាគត។

សាធារណរដ្ឋសហព័ន្ធអាល្លឺម៉ង់ និងកម្ពុជា មានទំនាក់ទំនងការទូតតាំងពីឆ្នាំ១៩៦៧ ទោះបីជាទំនាក់ទំនងទាំងនេះត្រូវបានរំខាននៅចន្លោះឆ្នាំ ១៩៦៩ និង១៩៩៣ក៏ដោយ។ សាធារណរដ្ឋសហព័ន្ធអាល្លឺម៉ង់បានបង្កើតទំនាក់ទំនងផ្លូវការជាមួយក្រុមប្រឹក្សាជាតិកំពូលរបស់កម្ពុជា (SNC) ក្នុងឆ្នាំ១៩៩២ និងបានប្ដូរទៅជាស្ថានបេសកកម្មកាទូតបន្ទាប់ពីការបោះឆ្នោតឆ្នាំ១៩៩៣៕